Asistimos á 25ª edición da Feira Internacional de Produtos do Mar Conxelados CONXEMAR, que converteu a Vigo na capital europea da pesca conxelada. A feira é un encontro de todos axentes do sector: produtores, exportadores e importadores, distribución, transformadores, software e maquinaria para a industria auxiliar, empresas de comunicación especializada, etc…
Nesta edición acudiron 760 expositores de 46 países diferentes e 27.080 visitantes de 110 países, un 1.29% máis que na edición de 2023, segundo datos da organización. A feira xera cada ano 235 millóns de euros e 6.500 empregos na comarca, segundo o informe de impacto elaborado pola Zona Franca e a Cátedra Ardán da Universidade de Vigo. O presidente de Conxemar, Eloy García, expresou na inauguración a necesidade de seguir crecendo para aumentar o número de empresas expositoras e recordou que por cada 6.000 metros cadrados de demanda insatisfeita pérdense 20 millóns de euros.
Cada ano, no marco deste evento, celébrase o Congreso CONXEMAR, no que se expoñen os retos, necesidades e tendencias do sector transformador. Nesta ocasión presentouse o último Informe SOFIA da FAO, sobre o estado mundial da pesca e acuicultura, que ten como eixo central a transformación azul. O informe expón as iniciativas da FAO que teñen como obxectivo integrar os alimentos acuáticos na seguridade alimentaria e a sustentabilidade mundiais, potenciar a promoción de políticas, a investigación científica e a creación de capacidade, difundir prácticas sustentables e innovacións tecnolóxicas, así como apoiar a participación da comunidade. Outros eixos sobre os que pilotou o congreso foi a xestión sustentable de recursos pesqueiros, retos e oportunidades en materia normativa, innovación na cadea de valor, e cambio climático e comunicación responsable.
Podes ler o informe SOFIA 2024 aquí.